> 2014 - "Lettera di una platana" - Monastero del Bene Comune

NEWS

Home Top Ad

Post Top Ad

domenica 13 luglio 2014

> 2014 - "Lettera di una platana"

Cara Olga,

i lo sa tuti che i condanadi a morte i g’ha el dirito a un ultimo desiderio, 
na cica o un bicér de vin.

Mi, de ciche spusone l’è più de setanta ani che ghe ne ciucio, 
e el vin no’l m’è mai piasù, 
e alora me bastarìa che te me scoltàsi 
e che ghe disési a tuti quel che te digo.

Ho savù che i me vol copar par decapitasiòn, 
ma, vuto che te diga, mi no ho mia capì parchè. 
I dise che i vol slargar un cicin la strada proprio dove che ghe son mi par far svoltar le machine che va a San Masimo, 
che così el trafico el sarà tanto più svelto. 
I dise che sta roba qua i l’ha dita i tennici, che non se pol miga far sensa, 
che l’è tuto sa stabilido, 
e che mi no conto niente, 
che bisogna che tasa e me la meta via.

Ma parchè i te copa ghe vol che te abi fato qualcosa de mal, 
che te abi copà ti quachedun, o roba del genere, 
ma cosa onti fato mi? 
Mi me parea de esar un bel albaro, grande, san, coi gardelini che ghe canta insima,
 de farghe un pochetin de ombra a le case che g’ho dedrio, 
de esar in linea co le altre piante del vial, 
e che quando vien i tesesechi nel’albergo tuto colorà, de esar gentile e elegante con lori che ne porta un pochi de schei, adeso che semo tuti in braghe de tela. 
Niente, le machine le gh’ha da svoltar, e ti tasi e mori.

No conta niente setant’ani de onorado servisio. 
Setanta, parchè i sarìa più de otanta se no fuse che na bomba de l’ultima guera, 
cascada proprio davanti al civico 27, la avese sbregà quei che g’era prima, 
e così i m’ha meso so subito dopo. 
Nel ’48 gh’ero sa, 
gh’è na foto de una, che adeso l’è na pora vecia che l’è più de là che de qua, 
che alora la s’è sposada e la s’è fata fotografar sul pontesel de casa sua 
e me se vede mi de drio. 
Alora el marciapiè l’era de tera, g’era dele gran piere squadrade che le fasea da sentari, e de drio g’era n’ostaria col campo de bocie, e casete picinine con davanti el foseto de quando qua l’era campagna.

Nei ani ’60 qua pasava anca la Cicolare, la filovia che faseva el giro intorno ala cità, 
una da na parte (Circolare Destra) e una da quel’altra (Circolare Sinistra), 
proprio un bel servisio.
 Ghe montava su i butei, ghe n’era du che andava al Mafei,
 e i partiva ale sete e quaranta par rivar al Ponte Piera, 
e i rivava prima de le oto. 
Pènsete ti ancò se i saria rivadi in tempo...
Ho capido, faso discorsi da vecio, ma mi son vecio!
E po i ne vol copar.
Ansi, i ne coparà.

Mi son na pianta, 
anca un pochetin bastarda, 
mesa italiana e mesa mericana,e capiso poco, 
ma me domando: parchè proprio mi?

I m’ha dito de no far discorsi NIMBY, no ho mia capì cosa vol dir,
deve èsar che no bisogna mia guardar solo al proprio interese quando se trata de ambiente, 
ma no l’è mia dedrio a casa mia che i vol far casin, 
l’è mi che i me vol copar.

Alora lasè che me sfoga. 
Mi me digo che i me vol copar parché no son mia proprio de sangue puro, 
e che son anca poareto, 
e che anca se son belo sono un bastardo, sangue misto. 
Come tanti che sta qua, 
che i è un pochi veronesi ma anca teroni 
e magari anca cinesi e rumeni e ucraini (o rusi, no i sa gnanca più cosa che i è). 
Che mi e quei altri no g’avemo miga santi in paradiso, 
e, dato che g’era un pochi (gnanca proprio pochi) de schei da butar via 
(magari fasendoli ‘ndar in qualche posto giusto....) 
l’era facile ciaparsela con mi e coi me fradei (i ne copa in diese) 
che tanto semo de legno e no capimo niente.

Scolta Olga, no digo che semo ne le to man, che anca ti te si poareta, 
ma da ti i vien in tanti e alora dighele a tuti ste robe qua.

Te struco coi me rami e te baso coi me stomi 
(quei che i è botanici i capise, quei altri che i se rangia)
Tuo
Platanus hybrida moritura (in latin i albari i è tuti done)

"lettera di una plantana" di Adriano Zanetti

Post Bottom Ad

Pages